لاہور:اجتماعی زیادتی کی شکار غیرملکی لڑکی ڈیانا کی پاکستان میں شادی اور طلاق کا انکشاف سامنے آیا، ڈیانا کا مبینہ نکاح پاکستانی شہری سے 12 فروری 2025 کو راولپنڈی میں ہوا تھا۔
تفصیلات کے مطابق لاہور کے علاقے ڈیفنس سی میں 22 سالہ غیرملکی لڑکی سے مبینہ اجتماعی زیادتی کے واقعے کے معاملے میں اہم تفصیلات سامنے آگئیں۔
ذرائع نے بتایا کہ متاثرہ لڑکی ڈیانا باگی کی پاکستان میں ایک پاکستانی شہری سے شادی بھی ہوئی تھی تاہم ڈیانا کو پاکستانی شوہر سے ملنے والے مبینہ طلاق نامےکی دستاویز بھی منظرعام پر آگئی ہے۔
ذرائع نے کہا کہ شبیراحمد عرف نقاش سے دوستی کے معاملے پر ڈیانا کے شوہر نے اسے مبینہ طور پر طلاق دی تھی، جس کے بعد ڈیانا نے شبیراحمد کے ساتھ رہنا شروع کردیا۔
ذرائع کا کہنا تھا کہ شبیر احمد ڈیانا کو لاہور لے آیا اور اپنے دوست توحید بٹ سے بھی ملوایا، ڈیانا اور شبیر کچھ عرصہ ایبٹ آباد میں بھی رہے، بعد ازاں دوبارہ لاہور آگئے۔
پولیس نے مبینہ واقعے کے معاملے میں شبیراحمد کو بھی حراست میں لے رکھا ہے، جبکہ واقعے کی مزید تحقیقات جاری ہیں۔