کراچی میں ایم اے جناح روڈ پر واقع گل پلازہ میں آگ لگ گئی، جس کے نتیجے میں 3 افراد جاں بحق ہوگئے۔ دھویں کے باعث متعدد افراد کی حالت غیر ہوگئی، جنہیں اسپتال منتقل کردیا گیا۔
فائر بریگیڈحکام کا کہنا ہے کہ 8 فائر ٹینڈرز، ایک اسنارکل اور ایک واٹر باوزر کی مدد سے آگ پر قابو پانے کی کوششیں جاری ہیں جبکہ آگ کو آگے بڑھنے سے روک دیا گیا ہے۔
چیف فائر افسر کا کہنا ہے کہ آگ کو تیسرے درجے کی قرار دے کر شہر بھر سے فائر ٹینڈرز طلب کرلیے گئے ہیں جبکہ آگ کی و جہ سے عمارت کے ایک حصے کا پلر گر گیا ہے۔
ریسکیو حکام کا کہنا ہے کہ شاپنگ پلازہ میں کئی افراد کے پھنسے ہونے کی اطلاع ہے، آگ شاپنگ پلازہ کے میز نائن فلور پر لگی، آگ نے گراؤنڈ اور فرسٹ فلور کی دکانوں کو بھی لپیٹ میں لے لیا، شاپنگ پلازہ گراؤنڈ ، میز نائن پلس دو فلور پر مشتمل ہے۔
رپورٹ کے مطابق آگ شاپنگ پلازہ کے میزنائن فلور پر لگی ہے۔ شاپنگ پلازہ گراؤنڈ، میزنائن پلس دو فلور پر مشتمل ہے۔ آگ نےگراؤنڈ اور فرسٹ فلور کی دکانوں کو بھی لپیٹ میں لے لیا۔
چیف فائر آفیسر کا کہنا ہے کہ عمارت میں زوردار دھماکا ہوا، جس کے بعد آگ مزید پھیل گئی ہے، دھماکا گیس لیکج کے باعث ہوا۔
مارکیٹ ذرائع کا کہنا ہے کہ شاپنگ پلازہ میں دکانوں کی تعداد ایک ہزار سے زائد ہے۔
آتشزدگی کے باعث اطراف کے علاقوں میں تبت چوک سے گارڈن چوک ایم اے جناح روڈ اور انکل سریا چوک سے سینٹرل پلازہ تک ماسٹن روڈ بند ہے
وزیر داخلہ سندھ ضیاء الحسن لنجار نے کہا ہے کہ شہریوں کیلئے محفوظ راستے کیلئے متبادل ٹریفک روٹس بنائے جائیں، ایس ایس پی سٹی آگ لگنے کی وجوہات کا پتا لگائیں۔
وزیر داخلہ سندھ کا کہنا ہے کہ عمارت میں آگ کو پھیلنے سے روکا جائے، فائر بریگیڈ گاڑیوں اور عملے کی رسائی کے لیے راستوں کو کلیئر کیا جائے۔
میئر کراچی مرتضیٰ وہاب نے گل پلازہ میں آگ سے جانی نقصان پر افسوس کا اظہار کیا اور کہا کہ مشکل وقت میں جاں بحق افرادکے اہل خانہ کے ساتھ ہیں۔
انہوں نے بتایا کہ آگ بجھانے کیلئے امدادی کارروائیاں جاری ہیں، متاثرین کو فوری امداد فراہم کی جائے تاکہ مزید جانی نقصان نہ ہو۔
گورنر سندھ کامران ٹیسوری گل پلازہ پہنچ گئے، لگنے والی آگ پر اظہار تشویش کیا اور امدادی کاموں کا جائزہ لیا۔
گورنر سندھ نے متعلقہ اداروں کو فوری ریسکیو اور امدادی کارروائیاں تیز کرنے کی ہدایت کی، آتشزدگی سے متاثرہ تاجروں اور افراد کے لیے ہر ممکن تعاون کی یقین دہانی کراتے ہوئے آگ پر قابو پانے اور واقع کی رپورٹ فوری طلب کرلی۔
پی پی پی چیئرمین بلاول بھٹو زرداری نے کراچی میں شاپنگ پلازہ میں آتشزدگی کے نتیجے میں جانی و مالی نقصان پر اظہار افسوس کیا،
چیئرمین بلاول بھٹو زرداری نے ایم اے جناح روڈ پر واقع شاپنگ پلازہ میں آتشزدگی میں جاں بحق ہونے والے افراد کے خاندانوں سے تعزیت کا اظہار کیا۔
انہوں نے وزیراعلیٰ سندھ اور میئر کراچی کو آگ بجھانے کیلئے تمام ممکنہ وسائل بروئے کار لانے کی ہدایات کی۔
بلاول بھٹو نے واقعے سے متعلق فوری تحقیقات اور آئندہ اس طرح کے واقعات کی روک تھام کیلئے اقدامات کی بھی ہدایات کی۔